Act 28 | MMX | STEP | Maga rupot avukat go loxon, la maga long lenger i do mo losoxan laasen teren Malta.

aAis 6:9-10

Acts 28

Pol Ga Nemen To Malta

1 Maga rupot avukat go loxon, la maga long lenger i do mo losoxan laasen teren Malta. 2 Limixin mego diga lok tooro avukat nama. Larakabu mo ga vot kaxat la maga mudut aleng tinotno; la diga xip kaka lengkumut la diga mas antos laxao la diga lox avukat tinotno nama. 3 Pol ga lok ka lengkonuna la ga lok li i ro at laxao la lara lisii ga sixisu ukamang, basinge lengkonuna mumu liplivi ap mo laxao la ga at avarang at lekngen ne Pol. 4 Limixin ap mo losoxan diga ven mo lisii ga merem to at lekngen ne Pol la diga lok tinedi getgesara xeretna, “Na laradi neni laradi sepsev amet tadi, kuren la ne Moroa noxo lok arooro i, keke i do ni goxo seeve ro at laras.” 5 Ketla ne Pol ga semla xepe mo lisii uto at laxao la tavanga xapmek goxo rupot saparav i. 6 Diga ngangais mo lekngen ne Pol do naba dang kaxat kopla neni na subu la na met. Ketla melemu diga ngais babaalom aleng la kopmen di goxo ven tepanga xakapmek ga vot saparav i, kuren la diga ba gili lodoxoma atdi la diga lok, “Neni lomoroa.”

7 Goxo vaxalom at loxongkangka at laradi silok ne Pabilias, neni laradi gomgo ap mo losoxan. Ni ga lok tooro aleng nama, la at lavantun aleng maga nemen ngan lavaose ro at loogu ren. 8 Temen ne Pabilias mo gak midi at loora, ni gak meres aleng mi liplivi la lebelen dedele. Pol ga beles uto xeneng at loogu ren, ga sing, la ga lok li lukngen to mavana ren, la ni ga lox avukat ta. 9 Mo limixin diga ven i na la diga lok ka bok nedi limixin mekmeres me go ap mo losoxan uto saparap ne Pol la ni ga lox aroo nedi. 10 Diga lok ngangao aleng atnema la diga raba nema mi buaang leventamtaba. Melemu at lavantun gaaling ga auret do mana sixit kaxat mi lavattaaxup la diga lok li lempanga rinama ro vana at lavattaaxup, diga raba nama mi lempanga ri mo lavatpas atnema.

Pol Ga Vas Kaxat Boro Malta Uto Rom

11 Maga nemen go at lavantun gaaling la maga sen kaxat mi lavattaaxup boro Aleksandria, laasen teren, “Luxalaisang Moroa.” Mo lavattaaxup ga nemen go ap mo losoxan at leven gaaling at lamanman. 12 Maga rupot to at lemenemen silok Sirakus la maga nemen go at lavantun aleng. 13 Maga sen kaxat manga mego la maga rupot to at lemenemen Regiam. Ap mo laaleng melemu lamanman avukat ga vot, la at mo manga lara laaleng melemu maga rupot to at lemenemen Putioli. 14 Maga long lenget lentaba luvuttadi nuunu mo go la diga sue nama xusu mana nemen eburu minedi at lavanuti aleng. La magak lox amisix i xuren at lavatpas atnama uto Rom. 15 Luvuttadi nuunu ro Rom diga ronga i do nema maga vot la digat pas epolo uto at lenep etang at ne Apias la uto at lemenemen laasen teren Lavantun Laraugu kusu ri ekip tangarang minama. Pol ga ven di la ga tong avukat ti ne Moroa la lodoxoma ren ga lolos ba.

Pol Ga Ekip Tangarang Mi Leme Judaia Ro Rom

16 Maga rupot to Rom, la diga siam do ne Pol na nemen kusuk la lara laradi esep na lok tatao i.

17 Melemu at lavantun aleng Pol ga xup bubua ka luvuttadi amgomgo at leme Judaia. Diga rupot buru, la ne Pol ga lok tinedi, “Luvutnetak! A goxo lok tepanga xapmek mumu limixin atdik kopla leretere at lavalabat atdik. Ketla diga lok li ia at loxokoxo ro Jerusalem la diga song araba ia uto at limixin me Rom. 18 Diga susue ia la diga lok do na soxomus asu ia, mila diga long lenger i do nia xopmen a goxo lok kapmek tepanga xusu nia aba met nov i. 19 Ketla leme Judaia di goxopara i do dina soxomus asu ia la nia aga sing kusu uto ia at ne Kaisar kusu na ronga linga rak. Nia aga lox i nom ketla nia a goxo lok li tevempapaase mumu rinedi mo limixin me Judaia. 20 Kuren la aga sing kusu ana ven nimi la ana epaase eburu minimi; nia a nemen at loxokoxo mila a nuunu at Lanarong, mo nedik limixin me Judaia ta nemen tangais i.”

21 Diga lok tin, “Maxo ruuna tevelinga loklox axasep boro Judaia mumu u, kopla tara atnema me Judaia ga laa me go mi tevelinga, kopla gita tong tevelinga xapmek mumu u. 22 Ketla ma vara i do mana ronga levelinga ram, mila ma ronga i do at lengkot axap limixin di paase mumu nom libinam tadi nenu uk lok teren.”

23 Kuren la diga lok katling lara laaleng eburu mi ne Pol, la buaang limixin diga vot ap mo laaleng to ap mo loogu ne Pol ga nemen teren. Ga maxantamak suubu se at laxanimin neni ga soxomus lavasuun at levelinga at Linintoo at ne Moroa rinedi. Ni ga lok tong pen i do na sat ka lodoxoma atdi mi levelinga ma xeneng at Lenavolo at ne Moses la levenmamalagan at lavaeme vapaase alii xusu diba nuunu at ne Iesu. 24 Lentaba atnedi diga nuunu at levelinga ren, ketla lentaba xopmen di goxo nuunu. 25 Kuren la diga vas kaxat basinge i mila levendoxoma atnedi ga ekarakat melemu at levelinga at ne Pol. Ni ga tong i ridi xeretna, “Loroonan Kaala ga vaase ruturun at lungusno at leeme vapaase alii ne Aisaia tinedi lavalabat atnemi. 26 Ni ga lok,

‘Uto u la una lok tinedi nom limixin keretna, mibang tonga, ketla mi noxo xasep teren; miba reven, ketla mi noxo ven kisiv i. 27 Mila levendoxoma atnedi na limixin ira rebonot pam, dira lok pe vam levenbaalung atnedi. La dira vampe vam levengkatli atdi. Naba lok kapmek do dina ven mi levengkatli atdi; la dina ronga mi levenbaalung atdi, la levendoxoma atdi nakleklen, la dina rem gili saparav ia, la nia ana lox avukat nedi.” ^a

28 La ne Pol ga lok bok, “Minaklen avukar i do, levelinga loklox arooro at ne Moroa diga lox aonon pam i uto at limixin kopmen di me Judaia. Dibang tonga i.” 29 [Melemu at ne Pol ga tong i na, leme Judaia diga on basinge i, la diga epaase mukmusak aleng kantubu atdi.]

30 Ga legepu maares Pol ga nemen mo go ap mo loogu neni ga unun amisix i, la gak lok momo aleng tinedi digat posiga i. 31 Ni ga vavang mi Linintoo at ne Moroa la ga vanasa bok mi laasen at Leeme Silok, ne Iesu Karisito la kopmen tara goxo ru pe lugugu ren; ni ga paase mi lolos la kopmen gita marat.